By Village Missionary Movement

Monday, 29-Jun-2026

దిన ధ్యానము(Telugu) 29.06.2026

 

అంశం: ప్రభువా లేక ఆయన ఇచ్చే ఆశీర్వాదమా?

 

“…ఆయన నన్ను శోధించిన తరువాత నేను సువర్ణమువలె బయట వత్తును” - యోబు 23:10

 

పరిచర్యలో ఎంతో శక్తివంతంగా ప్రకాశిస్తున్న ఒక సహోదరి, ఒక పుస్తకంలో తన సాక్ష్యాన్ని పంచుకున్నారు. ఆమె పరిచర్య ప్రారంభ దినాలలో, ప్రభువు స్వరం ఆమెకు స్పష్టంగా వినిపించింది: “నా కుమార్తె, నీవు ప్రేమిస్తున్న ఆ వ్యక్తిని విడిచిపెట్టు. నేను నిన్ను వాడుకోవాలని ఆశిస్తున్నాను.” ఆ మాట వినగానే ఆమె హృదయం ముక్కలైపోయింది; దేవుడు తన ప్రాణాన్నే అడుగుతున్నట్లు ఆమెకు అనిపించింది. అయినప్పటికీ, తనను సృష్టించి, ప్రేమించిన దేవుడు తనకు ఎన్నటికీ కీడు చేయడనే పూర్తి నిశ్చయతతో, ఆమె ఆ వ్యక్తికి క్రమంగా దూరమవ్వడం ప్రారంభించింది. కొద్ది కాలంలోనే, దేవుడు ఆమెను శక్తివంతంగా వాడుకోవడం ప్రారంభించారు, మరియు ఆమె అనేకులకు ఆశీర్వాదకరంగా మారింది.

 

బైబిల్లో దేవుడు అబ్రాహామును శోధిస్తూ అతను ఎంతగానో ప్రేమించిన తన ఒక్కగానొక్క కుమారుడైన ఇస్సాకును దహనబలిగా అర్పించమని అడిగారు. అబ్రాహాము తన ఆనందానికి మూలమైన ఇస్సాకును బలిపీఠం మీద దేవునికి దహనబలిగా అర్పించడానికి సిద్ధపడ్డాడు. ఈ విషయాన్ని అతను శారాతో చెప్పలేదు. మోరియా పర్వతానికి వెళ్లే దారిలో, తనతో వచ్చిన ఇద్దరు సేవకులను కూడా వెనుకనే విడిచిపెట్టాడు—ఎందుకంటే వారు తన దైవ కార్యానికి అడ్డుపడకూడదని అతను భావించాడు. అబ్రాహాము దేవునితో కలిగి ఉన్న సహవాసానికి ఏ భూసంబంధమైన బంధమూ అడ్డురాలేకపోయింది. దేవునిపై ఉన్న ప్రేమ, విశ్వాసంతో అతను ఇస్సాకును బలి ఇవ్వడానికి సిద్ధపడినప్పుడు, యెహోవా దూత, “ఆ చిన్నవాని మీద చేయి వేయకుము, వానికేమియు చేయకుము” అని సెలవిచ్చాడు. అంతేకాక, ప్రభువు అబ్రాహాముతో ఇలా అన్నాడు: “నీకు ఒక్కడైయున్న నీ కుమారుని ఇయ్యనొల్లక నీవు ఈ కార్యము చేసినందున…” “నేను నిన్ను నిశ్చయముగా ఆశీర్వదించి, ఆకాశ నక్షత్రములవలెను, సముద్రతీరమందలి ఇసుకవలెను నీ సంతానమును నిశ్చయముగా విస్తరింపజేసెదను.” అబ్రాహాము ప్రభువు మాటకు లోబడినందున, “నీ సంతానము ద్వారా భూమిపైనున్న సమస్త జనములు ఆశీర్వదించబడును” అనే వాగ్దానాన్ని పొందాడు.

 

ప్రియ స్నేహితులారా, దేవుడు మనలను ఒక ప్రత్యేకమైన రీతిలో ప్రతిష్టించడానికి మనలను శోధిస్తారు. ఈ రోజు మన హృదయం దేనికి అంటుకొని ఉంది? దేవునికా, లేక ఆయన మనకు దయచేసిన ఆశీర్వాదాలకా? మన ప్రయాణం దేని వైపు సాగుతోంది, దేవుని మహిమ వైపా లేక లోకసంబంధమైన గొప్పతనం వైపా? ఒకప్పుడు సాధారణ మనుష్యుడిగా ఉన్న అబ్రాహాము, ఈ రోజు తరతరాలుగా “విశ్వాసులకు తండ్రిగా పిలవబడుతున్నాడు. దేవుడు మనల్ని విడిచిపెట్టమనే వాటి నుండి మనం దూరంగా జరిగితే, ఆయన నిశ్చయముగా మన పేరుకు ఘనతను చేకూరుస్తారు.

- జి. ఎస్తేర్ సెల్వి గారు 

 

ప్రార్థన అంశం:

మా యూత్ క్యాంప్‌కు హాజరైన యువతీ యువకుల పరిశుద్ధ జీవితాలు కాపాడబడేలా దయచేసి ప్రార్థించండి.

 

*Whatsapp*

ఈ దిన ధ్యాన సందశమును తమిళ్, ఇంగ్లీష్ , హిందీ, మలయాళం, తెలుగు, కన్నడ, పంజాబీ మరియు ఒరియా బాషలలో వాట్సాప్ త్వరా పొందుటకు *+91 94440 11864* అనే నెంబర్ ను సంబ్రదించగలరు.

 

www.vmm.org.in

ఈమెయిల్: info@vmm.org.in

Android App: https://play.google.com/store/apps/details?id=com.infobells.vmmorgin

 

విలేజ్ మిషనరీ మూమెంట్, విరుదునగర్, ఇండియా- 626001

ప్రార్ధనా అవసరాల కోసం: +91 94424 93250